Neskek Jauziak dantzatuko dituzte Luzaideko Bolant Egunean

Urte bat iragan da Luzaideko Bolanten nesken parte hartzeaz herri galdeketa antolatu zutenez geroztik. Harrezkero, aitzin pausuak ematearen alde lan egin dute. Ibilbide horren fruitua igandean islatuko da Luzaideko Santiago plazan. Lehen aldiz Bolanten Egunean, neskek Jauzi batzuk dantzatuko dituzte. Etorkizunari begira, dantza kopurua emendatzea espero du Bolanten batzordeak.

Iazko martxoan Luzaiden erroldatutako 150 bat pertsonek galdeketa batean parte hatu zuten: "Mutilek egiten duten bezala, neskek dantza taldean parte hartzearen alde zaude? Hala bada, nola jantzita? Zein pertsonaia ordezkatu beharko lukete?". Emaitza argia izan zen. Gehiengoa, hots %75a, tradizioa aldatzearen alde agertu zen. Parte hartzaileen %65a gaur egun neskek dantzatzen duten jantzia mantentzearen alde agertu zen.

Urtarrilean, Jauziak dantzatu nahi dituzten neskak elkartu ziren eta bidea eraikitzen segitu zuten. Berdintasunaren aldeko bidea. Jon Arrikaberri batzordeko kideak azaldu duenez, neskek, berek, dantza zehatz batzuk proposatu zituzten. Bere erranetan, "poliki poliki Jauzietan sartzeko xedez".

Hori dela eta, igandean ospatuko den Bolant Egunean neskek, mutilekin batera, "Egi, Marianak, Ostalerrak, Zazpi Jauziak eta Antxoritz" dantzatuko dute. Goizean, baita arratsaldean Arretxe pilotalekuan eskaintzen duten emanaldian ere.

Arrikaberrik dioenez, zailena dantzen arteko koordinazioa izaten ari da. Hau da, Jauziak eta Kontradantzak dantzatu nahi dituzten nesken kopuruaren arteko koordinaketa. "Batzordeari hautatu dituzten dantzak egokiak iruditu zitzaizkigun. Beste erabaki bat hartu bazuten ere, ados izango ginen", erantsi du.

Erronka: norberaren hautua

Egun hauetan Bolanten bezperako emozioa sentitzen hasi da Nafarroako herrian. Nesken artean gogoak nabaritzen direla aitortu du dantzariak. "Giroa baikorra da, igandea ailegatzea nahi dugu eta orain arte egin bezala ongi ateratzeko helburua dugu", gehitu du.

Aurtengo edizioa bereziagoa denez galdegiterakoan, kidearen aburuz, nesken parte hartzeari dagokionez "baietz" izan daitekeela dio. "Hala ere, azpimarratu behar da neskek Jauziak dantzatu dituztela jada. Baina berezia da, Luzaiden, Bolant Egunean, lehen aldiz parte hartuko dutelako", aipatu du.

Tradizioaren aldaketa modu "naturalean" egin dela erran du. "Espero dut urteak pasako direnean, eta ez dut uste asko pasako direnik, neskak dantza askoz gehiagotan parte hartzeko prest izango direla", azaldu du Jon Arrikaberrik. Ildo horretatik, batzordeak ez du helbururik finkatu, baina egin izango balu ondorengo litzateke: "bakoitzak nahi dituen dantzak dantzatzea".