Nafarroako historia irudikatzen duen dantza ikuskizuna eskainiko da

Ikuskizun hau Kukuka antzerki eta dantza taldearen hamargarren urteurrena dela-eta antolatu da, eta herriko ordezkariek Ibarrako gaztetxoen dantza taldea gonbidatu nahi izan dute.

Prentsaurrekoan Nogales zinegotziak ikuskizunaren hitzaurrea egin zuen eta ondoren Agirretxek komentatu zuenez, «Kukuka hasi zenean lau talde ginen eta gaur egun 70 baino gehiago ditugu. Pertsonen ibilbidea osatzen dugu, talde lana da eta horrela herria egiten dugu lagunartean», esan zuen Kukuka taldearen inguruan. Ondoren eskolako bi irakasleek hi- tza hartu zuten eta adierazi zutenez, datorren asteartean eskolako DBHko ikasleekin klase berezi bat egingo dute, bertara Julia Marin irakaslea gerturatuko baita.

Alurr dantzako ordezkariak, berriz, taldearen historia azaldu zuen: «1995. urtean hasi zen talde gazte bat gara. Denborak aurrera egin hala, jende berriaren agerpenaren eta gazteen asmoen ondorioz koreografiez osaturiko proiektu bat jarri genuen abian». «Koreografia hauek geure dantza tradizionaletan eta pauso tradizionaletan oinarritzen dira». Ikuskizunei dagokionez, 'Sua' (2008) eta 'Oinazez' (2010) lanak aurkeztu ondoren, beste berri batekin datoz «oraingoan iraganik gabeko herriak etorkizunik ez duelako», 'Izanak dirau, 1512'. «Dantza eskolako gaztetxoei Euskal Herriko historiaren zati bat dantzaren bidez bizitzeko aukera eman zaie. Alurr dantza taldearen beste aurpegi bat da eskola, taldearen Etorkizuna ziurtatzen duena».

Aiert Beobide zuzendari eta dantzariak istorio eta kondaira adierazi zuen: «Neska gazte batek liburua topatzen du emanaldi hasieran eta bertan Nafarroako historia topa-tzen du. Kondairak, errituak, festak, bizitzeko moduak, kultur nahasketak eta guduak eszenatokian irudikatzen dituzte dantzariek». Sarrerak salgai daude interneten 3 euro eta leihatilan 3,20 eurotan.