Momix dantza konpainiaren magia, Victoria Eugenian

Irudiak eta mugimenduak dira protagonista ikuskizun honetan; gaur eta bihar emango dute, 20:00etatik aurrera

Istorioak baino, ametsak kontatzen ditu ikuskizun honek eta irudiekin batera, dantza mugimenduak dira nagusi. Dantza klasikoaren mugak hausten dituen ikuskizun honek fantasia, sentsualitatea eta imajinazioa erakusketan ditu. Sunflower Moon ikuskizunaren ardatzetako bat argia da, eta argi nahasketa horiek fantasiazko mundu bat iradokitzen dute.

Moses Pendleton da ikuskizunaren koreografoa eta bere bizitzan «ezinbestekoak» diren hiru elementuren konbinazioarekin osatu du ikuskizuna: eguzkia, lorea eta ilargia. Bestalde, izenburua hitz-joko batetik sortu du Pendletonek; alegia, ilargia eta ekiloreekiko sentitzen duen maitasuna.

Dantzari taldea zuriz jantzita ageri da oholtza gainean, eta arintasun itxura ematen dute, beren mugimenduekin. Hori da, hain zuzen ere, Momix konpainiaren obren ezaugarrietako bat.

Argiari ez ezik, musikari garrantzi handia eman dio Pendletonek ikuskizunean, eta Buddha Experience, Brian Eno, Waveform eta Hans Zimmer artistekin musika banda osatu du.

1980an sortua

Sunflower Moon ikuskizuna 2004ean estreinatu zuten Italian, eta bi urtez emanaldirik eskaini gabe egon ondoren, Donostian aurkeztuko dute ikuskizuna. Ordu eta erdiko ikuskizunak bi atal ditu: Sea of Tranquility eta Bay of Seething izenekoak.

Momix konpainia 1980an sortu zuen Moses Pendleton koreografoak, izen bereko obra Neguko Joko Olinpikoetarako konposatu eta gero. Obrari izen hori jarri zion eta ondoren, dantza konpainia sortzea erabaki zuen.

Momix konpainiarekin lan egiteaz gain, Pendletonek koreografo eta dantzari gisa lan egin du hainbat dantza konpainiatan. Telebista saioetarako ikuskizunak ere prestatu ditu, eta sari ugari jaso.

Sarrerak antzokiko leihatilan eskura daitezke, 16, 22 eta 30 eurotan.

Lacarraren emanaldirako sarrerak agortuta

Victoria Eugeniako udazkeneko denboraldiaren baitan, Lucia Lacarra dantzari zumaiarrak emanaldia eskainiko du datorren azaroaren 17an eta 18an. Bi emanaldietarako sarrera guztiak agortu egin dira dagoeneko. Lucia Lacarrak zortzi koreografiaz osatutako programa aurkeztuko du, koreografia klasikoak, neoklasikoak eta garaikideak uztartzen ditu ikuskizunak. Bereziki Victoria Eugeniarako prestatu du Lacarrak.

Momix dantza konpainiaren magia, Victoria Eugenian

fitxa

Izenburua. Sun Flower Moon.
Taldea. Momix.
Lekua. Victoria Eugenia Antzokia.
Eguna. Urriak 16 eta 17.
Ordua. 20:00.
Prezioa. 16, 22 eta 30 euro.