Edukira salto egin | Salto egin nabigazioara

Tresna pertsonalak
Hemen zaude: Hasiera › Hemeroteka › Mendizale beteranoek dantza egingo dute Iruñeako sanferminetan

Dokumentuaren akzioak

Mendizale beteranoek dantza egingo dute Iruñeako sanferminetan

Mendizaletasunak eta dantzak bat egingo dute Goierriko Mendizale Beteranoen hurrengo erronkan: hiru egunetan, Ordiziatik Iruñeara oinez joango dira eta sokadantza dantzatuko dute San Fermin egunean Iruñeako plazan. 1856. urtean Zaldibiako dantza taldeak, Joxe Agustin Olanoren gidaritzapean egindako ibilbidea egingo dute. Duela 159 urte zaldibiarrek egun bakar batean egin zuten oinezko bidea, hamaika bat orduan. Aralarko mapetan Dantzariaren Bidea izenarekin ezagutzen da.
Egilea
Loinaz Agirre
Komunikabidea
Goierriko Hitza
Mota
Albistea
Data
2015/07/03
Lotura
Goierriko Hitza

Goierriko Mendizale Beteranoak lasaiago hartuko dute eta hiru etapatan egingo dute 63 kilometroko zeharkaldia. Igandean, goizean goiz, 06:00etan, Ordiziako Frai Andresen estatuatik abiatuko dira Zaldibiarantz. 36 kilometroko etapa izango dute lehenengoa: Iztuetaren etxetik gora Akapulko aldera joango dira. Ur deposituetatik barrena Oiduira joango dira, eta handik, Enirio, Igartza, Guardetxe eta San Migeletik Madotzera (Nafarroa) iritsiko dira.

Asteleheneko bigarren etapa laburragoa izango dute, 23 kilometrokoa: Madoztik Berriozarrera (Nafarroa) joango dira, Irurtzundik eta Saratsate, Saratsa herri inguruetatik, errepide zaharraren paralelo doan mendi bidean barrena.

San Fermin egunean, hilaren 7an, kalez iritsiko dira Berriozartik Iruñeara, dantzariz jantzita.

San Fermin egunean dantza

Hiru eguneko zeharkaldiaren ondoren, San Fermin egunean, hilaren 7an, prozesioaren aurretik, 09:00etan, Iruñeako udaletxeko plazan dute dantzarako hitzordua.

Mendizaleak dantzari bihurtuko dira goiz batez. Jexuxmari Garate dantzari goierritarrarekin hiru hilabetean Gipuzkoako sokadantzaren pausoak ikasi dituzte eta 15-17 bat dantzarik egingo dute dantza, Mikel Sarriegi eta Mikel Apaolaza beasaindar dantzariak lagun dituztela. Zeharkaldia egingo duten mendizaleak gehiago izango dira, 40 bat. Etxarrin (Nafarroa) bazkaldu eta etxera itzuliko dira.

Dokumentuaren akzioak