Maskaradei buruz osatzen ari den filma ikusgai Muskildin

Aurtengo maskaradak ate joka direla – heldu den urtarrilaren 15ean hasiko dira Maulen –, Xiberoko ihauteei buruz Kepa Ugarte prestatzen ari den filma ikusgai izanen da Muskildin. Hitzordua urtarrilaren 12an ostegunarekin emana da, Xistera Zaharrean 19.30tatik goiti.

Ugartek berak aitortu du badirela urte batzuk hasi zela maskaradak filmatzen eta gai horri buruz ezagutza duten herritarrekin elkarrizketak egiten. «Nire helburua proiektu xume hori ahalik eta modu duinenean bururatzea da, betirako gera dadin. Hasiera hartatik laguntza eskaini zidaten horiek guztiak (batzuk zendu dira honez gero) eskertzeko manera bat da, ni nintzen ezezagunari haien jakinduria partekatzeko gai izan baitziren» aitzinatu du egileak. Bere xedea dokumentalari forma eman, editatu eta hauspotzea dela aipatu du.

Egilea bera osteguneko hitzorduan presente izanen da orain arte egin duen lanaren eta segidaren berri emateko. Emankizunaren ondotik, txistorra eta sagarnoarekin solastatzen jarraitzeko parada izanen da.