Miarritzeko (Lapurdi) Koreografia Zentroaren agintean zegoen Thierry Malandain oraingo zuzendariaren lekukoa hartuko du Martin Harriaga koreografoak. Atzo jakinarazi zuten zuzendari berriaren izena. Urte hastapenean osatu zuten zuzendaria hautatzeko epaimahaia, eta, berriki, Frantziako Kultura Ministerioari Martin Harriagaren izena iragarri ondotik, Rachida Dati Frantziako Kultura ministroak Miarritzeko Koreografia Zentroaren zuzendari berriaren izena jakinarazi dio Maider Arostegi Miarritzeko auzapezari, baita balleteko kideei ere. 2027ko urtarrilean hartuko du lekukoa.
Martin Harriaga Avignongo operako (Okzitania) zuzendaria da gaur egun. Bertzeak bertze, Avignongo azken festibalean America sorkuntza koreografikoa plazaratu zuen, Donald Trumpen botere hartzea salatuz. Bertzalde, Malandain Biarritz Balleteko koreografo elkartua izan zen 2018 eta 2021 bitarte. Ttipidanik dantzan murgildu zen, eta Ballet Biarritz Junior egituran sartu zen 19 urterekin. Ondotik, dantza formakuntza osatzeko, 2013an, Kibbutzeko Dantza Garaikideko Konpainia integratu zuen hiru urtez.
2016an, hainbat koreografia zentrok antolaturiko koreografo gazteen lehiaketa irabazi eta Sirènespieza sortu zuen (Sirenak), Miarritzeko 22 dantzarirekin. Dantza pieza hori muntatuz barneratu zituen dantza klasikoko kodeak. Horren karietara, Sacre du printemps koreografia karrikaratu zuen (Udaberriko sakratua); Thierry Malandainen L’Oiseau defeu (Suzko txoria) piezarekin batera aurkeztua izan da anitzetan. Alemaniako balletekin ere hainbat aldiz lan egin du, eta Bilaka kolektiboarentzat Gernika pieza konposatu zuen.
