Mariano Izeta eta Maurizio Elizalde gogoan Baztango dantzak eskainiko dituzte igandean Berroetan

Bi baztandarrak omendu nahi ditu Jo ala Jo Kultur Taldeak beraien jaiotzaren mendeurrenean

Jo ala Jo Kultur taldeak dioenez, «gure kultur oinordetzan haundi izan diren Maurizio Elizalde eta Mariano Izeta oroitzeko» bilduko dira igandean Berroetan: «Biek Baztango folkloreari ekarpen aberasgarria egin diote, neurri haundi batean hauen jarraipena bermatuz». Aurten 100 urte bete dira sortu zirenetik (1915eko uztailaren 14an jaio zen Mariano Izeta eta urte bereko irailaren 21ean Maurizio Elizalde) «eta horregatik ekarriko ditugu gogorat».

Jo ala Jo taldekoen erranetan, «baztandar guztion ardura da lan honi segida ematea, gure dantzak bizitzea, disfrutatzea eta haiek egin zuten bezala ilusioz bustitzea. Gure kulturak herrietan arnasa har dezan dantza gaitezen guztiok!».

Lan handia egin zuten Mariano Izetak eta Maurizio Elizaldek Baztango ondarearen alde. Argazkian, biak ageri dira Arizkungo Elkartasuna taldeko dantzariekin. Ezkerritik hasita lehenak dira, zutik Mariano eta kokoriko Maurizio. |