Oinkari dantza taldeak 50 urte beteko ditu azaroan eta urtemuga ospatzeko hainbat ekitaldi egingo ditu azaroaren 20tik 22ra. Horren aurretik, ordea, maiatzaren 10ean, Lorezainen konpartsa aterako dute. Otsailean hasiko dituzte konpartsa prestatzeko entseguak.
Egun pasa egiteko aitzakia izango dute billabonatarrek maiatzaren 10ean. Goizean herriko kaleak musikaz eta dantzaz alaituko dituzte eta parte hartzaileen bazkariaren ondoren, emanaldia egingo dute Errebote plazan, 18:00etan. Hiru modutara parte hartu ahal izango dute herritarrek konpartsan: dantzari, danbor-jotzaile eta pertsonaia moduan.
Dantzariek entseguak larunbatetan izango dituzte (otsailaren 8, 15 eta 22an; martxoaren 8, 15 eta 29an; apirilaren 5 eta 12an; eta maiatzaren 3an) ikastolako ganbaran 10:00etatik 12:00etara. Dantzak bikoteka izango diren arren, bikoterik ez dutenen kasuan antolakuntza saiatuko da dantza-laguna lotzen.
Danbor-jotzaileek, berriz, martxoaren 8tik aurrerako larunbatetan izango dituzte entseguak Aljibean, 11:00etatik 12:00etara. Pertsonaiak, berriz, lehen aldiz apirilaren 5ean elkartuko dira, 12:00etan, ikastolako ganbaran.
Kasu guztietan, entseguaren lehen egunean eman beharko da izena eta, dantzari edo danbor-jotzaileen kasuan, parte hartu nahi dutenek 16 urteak beteta eduki beharko dituzte. Dena den, Oinkari dantza taldekoek adierazi dutenez, urteurrenaren harira sortutako ekitaldian parte hartzea erabat zabala izatea nahi dute, herrikoia. «Saltsarako gogoz dagoen herritar orori dei egiten diogu parte har dezan».
