Libertimenduak ihauteriz jantzi du Bidarrai

Dantza, antzerkia eta bertsua uztartzen dituen libertimenduak bere lehen agerraldia egin du otsailaren 6an. Goizeko 10.00etan desfilean abiatu dira Bidarraiko plazarantz musikaz lagundurik, 10.30ean ekiteko Baxe Nafarroan ohitura den ihauterietako arte dramari. Giro ederrean iragan da kultur ekimena, bilduriko jendeen txalo eta irri artean.

Dantzari dotore eta garbiek emeki zirtzil ilun, zikin eta kritikoen lekua hartu dute Bidarrain, eta usaian bezala, bertsulariek narratu dute plazan gertatzen dena. Memento hunkigarria ere izan da, joan den urtarrilaren 28an auto istripuz zendu zen Leire Iribarneren omenez ohorezko aurreskua dantzatu eta bertsuak ere eskaini dituztenean. Gogora ekartzekoa da, gaztea Garaziko libertimenduko partaide ere bazela.

Azken hogei urteetan bereziki gazteek berreskuratu dute joan den mendean galtzear izan zen ohitura eta urteak pasa ahala, indarra hartzen ari da berriz ere. Horren seinale aurten ere dauden hitzordu ezberdinak, Bidarraikoaren ondotik, Amikuzeko libertimenduaren aldi izanen da otsailaren 13an. 11.00etan Donapaleuko karriketan itzulia eginen dute, 11.30ean herriko plazan emankizuna eskaintzeko. Ikastolaren eskutik bazkaria izanen da ondotik, erreserbak egiteko 0649590701 zenbakira deituz.

Otsailaren 26an, lehen aldiz, Donostiako Añorga auzoak estreinatuko du bere ihauteri berezia Harrobiaren plazan eta 27an, Iruñeko Santa Ana plazan eginen dute. Martxoaren 5ean Baxe Nafarroara itzuliko da, Baigorrira, hain zuzen. Astebete berantago, hilaren 12an Hazparnen eta 13an Oztibarren ospatuko da ihauteri garaiko erritoa.