Leire Kastresana ere ariko da 'Euskaldunak eta dantza' galan, Bilbon

Euskalduna jauregian dantzatuko du Lucia Lakarra, Elvis Val eta Oihane Herrerorekin batera, larunbatean

Kastresanaren izena azken orduan iragarri du gala antolatzen duen Bilbao Ballet Elkarteak. Haren izena larunbaterako prestatutako egitarau oparoari gehitu zaio. Izan ere, Lucia Lakarraren mailako dantzariak ariko dira galan. Lehen aldiz dantzatuko du Euskaldunan Municheko Operaren Balleteko dantzari nagusiak.

Oihane Herrero eta Elvis Val bakarlari bizkaitarrek ere lehen aldiz dantzatuko dute etxean. Alexander Zaitsev ariko da Herrerorekin taula gainean. Stuttgarteko Balleteko bakarlariak dira biak. Val, berriz, Hannoverko Operako Balleteko bakarlaria da egun, eta Essengo Balleteko dantzari nagusi Adeline Pastor izango du bikotekide larunbateko galan.

Andoni Arestik zuzenduko du gala, eta Verdini Dantza Taldearen emanaldiarekin hasiko da ikuskizuna.