Dokumentuaren akzioak
Laura Bastidak eta Ekain Uzkudunek irabazi dute Azpeitiko XVI. Dantza Suelto Txapelketa
Azpeitiko XVI. Dantza Suelto Txapelketaren sari nagusiak etxean gelditu ziren atzo, Santo Tomas egunez. Laura Bastida urrestildarrak eta Ekain Uzkudun azpeitiarrak osatutako bikoteak irabazi zuen txapelketa eta, gainera, Bastidarentzat eta Uzkudunentzat izan ziren dantzari onenei eskainitako banakako sariak ere. Hamasei bikote lehiatu ziren gaztetxoen mailako txapelketan, urtero legez ikuslez leporaino bete zen Sanagustin kulturgunean.
Herriko dantza suelto eskolakoek emaitza bikainak lortu zituzten oro har, aurreneko bost bikoteen artean lau Luis Alberdi Beltza-k zuzendutako eskolakoak izan baitziren. Euskal Herriko egungo txapeldunak, Iker Belinchon eta Maider Aginaga lezoarrak, sailkatu ziren bigarren postuan, Leire Eizmendi errezildarra eta Maider Arrieta azpeitiarra hirugarrenean, Anaitz Lizartza azpeitiarra eta Itziar Bastida urrestildarra laugarrenean, eta Aner Kerejeta eta Nagore Kerejeta azpeitiarrak bosgarrenean.
Bideoan, Bastida eta Uzkudun arin-arina dantzatzen ageri dira, sariak jaso ondoren eskaini zituzten bi piezetako azkena.
Txapelketako argazkiak eta bideoa ikusgai daude Uztarria.eus atarian.
Dokumentuaren akzioak
