Lana dantza pieza estreinatuko dute gaur Biterin, 19:00etan. Jaiotz Osa eta Xabier Mujika dantzariek sortutako ikuskizunerako sarrerak 8 eurotan eskuratu daitezke online edo Biteriko leihatilan. Dantza garaikidea lantzen duen lan honek prekarietatearen zein bizitza laborala eta pertsonala ezin uztartzearen inguruan hausnartzen du, besteak beste.
Lanak denok harrapatuta gaituen lan-kultura obsesiboa islatuko du, txikitatik eta ia heriotzaraino irauten duen tranpa. Osa + Mujikaren iraupen luzeko bosgarren obra da, bost interpretek taularatua: Rafke Van Houplines, Maddi Ruiz de Loizaga, Paula Parra, Adrian Bolaños eta Jaiotz Osa bera.
Lana, arrakasta, balioa edo estatusa bezalako kontzeptuekin lotzen dute. Garrantzitsua edo ezinbestekoa izatearen sentsazioa liluragarria da; baina hain arrakastatsua bazara, zergatik jarraitzen duzu astean 40 ordutik gora lanean?
Egindako gogoetari irudia jartze aldera, banaketa enpresa baten gorabeherak taularatuko dituzte, eta denborari —zehazki, denbora faltari— aparteko tokia emango diote, oholtzaren erdian jarriko duten erlojuaren bidez.
Lau langile ditu banaketa enpresa horrek, eta saiora helduko diren ikusleak langile horiekin identifikatuta sentituko direlakoan dago. Gartxot Unsain musikariak espresuki sortu du emanaldirako musika. Eta argiztapenaz, berriz, Isa del Moral arduratu da.
