Kukai-Tanttakak bi Max sari eskuratzeko aukera du bihar

Hautagai dira Aizpea Goenagaren 'Ezker-eskuma' lana eta Hortzmugaren 'Superplast'

Joseba Sarrionandiaren poemetatik abiatutako ikuskizuna da Hnuy Illa. Mireia Gabilondok zuzendua, Jon Maia dantzari eta Kukai taldeko kidearen koreografia du, eta Iñaki Salvadorren musika. Horrez gain, kolaborazio ugari izan du ikuskizunak: Mikel Laboa, Ruper Ordorika, Maria Berasarte, Asier Hernandez...

Bigarrengoz dago Kukai-Tanttaka Max sarietan. 2003an 1937, gogoaren bidezidorretatik ikuskizunarekin izan baitzen hautagai, lan berri onenaren sarirako.

Iazko uztailean estreinatu zenetik, arrakasta handia izan du Kukai-Tanttakaren obrak. Izan ere, kritikak eta ikusleek harrera ona egiteaz gain, sariak izan ditu. Abenduan, esate baterako, ikuslearen sari berezia jaso zuen Azpeitiko Antzerki Topaketetan. Gainera, Euskal Herriko hainbat antzokitan emanaldiak egin ditu, eta Galizian eta Mexikon ere izan da.

Aizpea Goenagak idatzitako antzezlana da Ezker-eskuma. Glu Glu konpainiak ekoitzi du, eta Goenagak berak zuzendu du Ane Gabarainekin batera. Bi emakume dira protagonistak, Rosa (Loli Astoreka) eta Sara (Iñake Irastorza). Bakoitza bere etxean bizi da, bere munduan, eta egunerokotasunak dakarzkien arazoekin ari dira etenik gabeko borrokan.

Zakar Jauna superheroiaren istorioa da, berriz, Superplast, Hortzmuga Teatroak egindako kale antzerkia. Julen Gabiriak idatzi zuen testua, Raul Cancelo izan da eszena zuzendaria, eta Pako Revueltas aktoreen zuzendaria.

Lan onenaren saria

Lan onenaren saria eskuratzeko, 15 lehiakide izango ditu Hnuy Illa-k. Esate baterako, Nafarroako Gaiarre antzokiaren Luces de Bohemia, Teatre Nacional de Catalunya y Teatre Ponent konpainiaren Singapur, Kataluniakoa, eta Lagarta Lagarta konpainiaren Aeroplanos, Galiziakoa.