Kukai dantza taldeak hainbat estilo eta garai elkartu ditu «Karrikan» lanean

Hiru koreografo garaikidek egindako hiru piezak osatzen dute «Karrikan»: Iker Gomezen «Aupa mutil» dantzak, Pantxika Telleriaren «Fight for fandango»k eta La Intrusa Danza taldeko Damian Muñoz eta Virginia Garciaren «Sorbatza»k, alegia. 55-60 minutu inguru irauten duen ikuskizun honetan, gainera, mota eta garai askotako musika nahastu du DZ DJak (Zigor Lanpre).

Taldeak ibilbide nagusia aretoetan egin izan duen arren, «Soka» kalerako prestatu zuten, eta gustura aritu ziren dirudienez. Jon Maya zuzendariak, atzo egin zen aurkezpenean azaldu zuenez, antzokiak xarma duen arren, «jendea sentsibilizatzeko eta dantza ikusten ohitzeko ona da gu kalera joatea».