Kukai dantza konpainiarekin zabalduko ditu ateak Campos antzokiak

Sei urteko zaharberritze lanen ostean, Bilboko antzokiak hilaren 11n ekingo dio programazio berriari

45 ikuskizunek baino gehiagok osatzen dute programazioa. Gehienak musikarekin lotuta egongo dira -ikuskizunen %42-. John Mayall, Victor Manuel, Milladoiro taldea eta Benito Lertxundi arituko dira antzokiko areto nagusian, besteak beste. Dantzak ere bere lekua izango du programazioan. Ekainaren 1ean, nazioartean oihartzun handia duen ballet konpainia baten ikuskizuna izango da, Corpo konpainia brasildarrarena. Ekainean, Susana Rinaldiren Argentina Contemporanea obra arrakastatsua ere ikusgai egongo da. Bestetik, Grease musikalaren bertsio laburtua eta Suso Silvaren Circo de los Horrores ikuskizuna ikusteko aukera egongo da.

SGAEren kudeaketa

Programazioa SGAE Espainiako Autoreen eta Editoreen Elkarteak eratu du. Izan ere, antzokiaren jabetza Bilboko Udalarena den arren, SGAEk antzokia kudeatzeko eskubidea izango du ondorengo 30 urteetan, 2003an hitzarmena sinatu zuelako Udalarekin. Antzokia ARTeria egitasmoaren barruan sartu du SGAEk. Europan eta Amerikan zabaldu duen sareak «ekoizpen eta hedapen artistikoaren plataforma gisa» jardutea nahi du.

Sei urte igaro dira Bertendona kaleko antzokian zaharberritze lanak hasi zituztenetik. Casadok azpimarratu duenez, antzokiak «puntako teknologia» du, baina antzokiaren kanpoaldeko jatorrizko itxura errespetatu dute. 1902an zabaldutako antzokiak art nouveau estilo italiarreko apaindura ugari ditu.