Kirola, musika, dantza eta bertsoak Berrizen jaietako lehen egunetan

San Pedro eta Santa Isabelen omenezko festek etenik gabeko aste luzea ekarri dute, egitarau betearekin

Goiza kirola eginez hasiko dute. Izan ere, 11:00etan bizikleta martxa herrikoia izango da, eta parte hartzeko asmoa dutenak udaletxe ataritik abiatuko dira, aurrez ezarritako ibilbidea egiteko. Hurrena, atzera begiratuko dute: antzinako auto eta motorren erakusketa jarri dute udaletxeko lorategian, eta 11:30ean irekiko dute. Ordu berean, baina eskolako jolastokian, umeentzako betiko olgeta tradizionalak berreskuratuko dituzte. Gaurko umeak lehengoen antzera jolastuko dira.

San Pedro egunaren bezperako arratsaldea pilota partidekin hasiko da. Oizpe elkarteak antolatutako zazpigarren txapelketako finalak jokatuko dira, Olakueta frontoian. 18:00etan, ostera, musika nagusituko da herriko kaleetan. Erraldoiak, zaldikoak eta Ondalan konpartsako musikariak batera eta bestera ibiliko dira, kalejiran.

Olakuetatik Elizondora arteko kronoigoera 18:30ean hasiko da. 20:00etan jasoko dute Donien Atxa, eta Dantzari Dantzaren entsegua egingo dute dantzariek. Gaurko eguna amaitzeko, Dindrots taldeak erromeria eskainiko du.

Astegunak ere, beteta

Bihar dute egun handia Berrizen. Hala, goizeko kalejiran nabarituko da egunaren berezitasun hori. 11:00etan, umeentzako margo lehiaketari ekingo diote. Elizako kanpaiek eguerdia dela iragartzearekin bat hasiko da meza nagusia. Bukatutakoan Dantzari Dantza eskainiko zaio San Pedrori.

Arratsaldean umeentzako ekitaldiak izango dira nagusi. 17:30ean 3x3 saskibaloi txapelketa jokatu dute, hala nahi duten 16 urtez beherako gaztetxoek, kiroldegian. 18:00etan, berriz, Atxiskitan ikuskizunaz gozatuko dute txosnetan.

Herriko hiru bertsolarik -Amuriza aita-alabak eta Gorka Lazkano- saioa egingo dute Elizondo plazan (19:00). Hurrena, Dantzari Dantza dantzatuko da. San Pedro eguna Luhartza taldearen dantzaldiarekin amaituko da.