Kaxa gainean San Pedroren omenez

Ohiturari jarraituz, kilin-kalakoa, andrazkoen aurreskua eta kaxarranka izan dira Lekeition

Agintarien prozesioaren eta mezaren ostean, antzinako ohiturari jarraituz, kilin-kalakoa egin zuten portuan San Pedroren irudiarekin. Ohitura horretan, santuaren irudia ur gainera okertzen dute. Zenbat eta gehiago okertu, arrantza oparoagoa izango ei da urte horretan.

Kilin-kalakoa egin ostean, kaxarranka egin zuten dantzariek, mendeetako ohiturari jarraituz. Hasteko, San Pedroren portuko irudiaren aurrean egin zuten, gero kofradia aurrean, eta, azkenik, herriko plazan. Azken urte hauetan bezala, Asier Uskolak egin zuen kaxa gainean dantza.

Kaxarranka kofradia parerantz abiatu eta gero, urtero legez, emakumezkoek aurreskua egin zuten herriko plazan, urteroko ohiturari jarraituz.

Gaur, San Pedro txiki

Jaiekin jarraitzeko, San Pedro txiki eguna izango da gaur, eta hainbat ekitaldi izango dira.

Alde batetik, eguerdian erromeria egongo da, musika bandarekin. Arratsaldean, igeri lehiaketa jokatuko da, Garraitzek antolatuta. 20:30erako, berriz, 1970eko hamarkadan oinarritutako festa antolatu dute Talan.

Bestalde, gazteen biltzarrak San Pedro Gazte Eguna antolatu du. Plater originalen lehiaketa, bazkaria, poteoa eta beste hainbat ekitaldi antolatu dituzte gazteek.

San Pedro Baltza Eguna ospatuko dute bihar. Rufo Atxurra plazan izango dira ekitaldiak. 12:00etan meza emango dute, eta horren ostean, kinkirrinkoia eta galletak emango dituzte Sostor elkartekoek. Arratsaldean, umeentzako jokoak eta txokolate jatea egongo dira. 22:00etan, Esteibar eta Obieta izango dira han.