Kabalkada Arrosara itzuli da herriaren mendeurrena ohoratzeko

Arrosako herriak ‘Ehun urtez’ kabalkada eskaini zuen ekainaren 17an. Gisa honetan, herriaren mendeurrena gogotik ospatu zuten Baxe Nafarroako herrian eta jendetza bildu zen herritarrek prestaturiko emankizuna ikusteko. Berez, sartzeak egun batzuk aitzin agortu ziren eta nahiz eta ortzantza giroan, euria mehatxu izan zuteb, emankizunarekin aitzinera egin zuten.

Duela bi urte, 2021eko udan, herritar andana bildu zen bilkura baten inguruan, gai berezi baten inguruan: nola ospatuko ditugu 100 urteak? «Aski nombre handian ginen, 50 bat, eta bizpahiru ideia atera ziren: antzerkia, bestak… Baina kabalkadaren ideia fite agertu zen» erran zuen KAZETA.EUSen iazko erreportajean Peio Claverie herriko axuantak eta kabalkadaren lehendakariordeak.

Kabalkadaren hiru ardatzak dira euskara, historia eta jendea bateratzea eta orotara ehun bat pertsona aritu dira lanean. Larunbateko arrakastaren ondotik, uztailaren 9an arratsaldeko 16:00etan izanen da bigarren emankizuna. Sartzeak 15 eurotan izanen dira, hamabi urtez azpikoak urririk sartu ahalko diren bitartean.