'Joare World'

MOZORRO AZPIAN

Egunero-egunero aditzen dira joare hotsak han. Giza irudia duten robotek ez dute inoiz erritmoa galtzen, eta ilarak beti egiten dituzte zuzen. Inguruan, sakelakoak eta argazki kamerak nonahi, horretan ezin bereizi errealitatetik. Mozorroak atera dira: batek motozerra du eskuan, brum-brum... besteak, kateak arrastaka. Estasia, euskaltasun orgasmoa, eta folklore gaindosia, une oro, parke tematikoan. Ezein euskaldunek ezinen luke galdu.

Dirutza irabazita, oporretara abiatu da Mutuberria. Kroazia boladan dago, eta, iparraldean, Rukavac herrian hartu du ostatu. Bat-batean, ezaguna zaion soinu batek esnatu du. Leihoa zabaldu, eta begiak bi bider igurtzi ditu indarrez. Berriz begiratu du. Larruak dituzte soinean, zapi gorriak lepoan, galtza zuriak, eta joareak gerrian. Ez da Ituren, ez da Aurtitz. Herrian galdetu du ea zein den manifestazioen buruan joan ohi diren horien kopia kroaziarra. Zvoncari-ak omen.

Nahasturik itzuli da etxera, eta Interneten begiratu du. Joareak ikusi ditu han eta hemen, Europako hainbat herritako inauteri tradizionaletan. Ez da hain bertako, hain bereizgarri. Parke tematikoak xarma galdu du, funtsezkoena falta baitzaio, han nekez uler litekeena. Inauteriak ulertzeko, tokian-tokian bizi behar dira.