Iurretako plazako lokalen inguruko dantzarien iritzia

Duela bi asteko Anboto irakurrita Iurretako udala plazako lokalak saltzeko prest dagoela jabetu ginen. Saltzeko arazorik ez, baina herriko talde ezberdinei leku fisiko bat emateko bai dirudienez.

Guzti honekin ez goaz txokoa egin nahi duten herritarren kontra, hauek eskubidea baitute lokala eskatzeko, baina udaletxearen jarrera ez zaigu egokia iruditzen.

Azken urteotan Iurretako elkarte eta eragile ezberdinek sarri jo dugu udaletxeko atea gure beharrak aseko dituzten aterpeen eske. Alabaina udalak bere jabetzako lokal gehiago ez zuela eta ez die gure eskaerei erantzun. Plazako lokalena da orain salbuespena. Lokal horiek udalaren jabetzakoak izanik, udalaren aurrekontuen eta borondate politikoaren esku gelditzen da lokal horien biharko eguneko erabilera.

Gure ustez, ekintza kulturalak sustatzen dituzten taldeen beharrizanak lehentasuna dute ekimen pribatuen beharrizanen aurrean. Horregatik, lokal horiek herrira zabaltzea eta talde ezberdinen nahiak asetzea eskatzen dugu.