Itsasi euskal kultur taldeak Itsasi Eguna ospatuko du larunbat honetan, hilaren 23an. Urtero egin ohi duten moduan dantza ikuskizunak izango dira goizean zehar, eta eguna amaitzeko bazkaria egingo dute.
Hain zuzen, 11:15ean taldeko dantzari txikiak Frontoi Txikin elkartuko dira, eta hortik abiatuta, Alde Zaharrean hainbat dantza ikuskizun eskainiko dituzte; hala nola Perez Arregi plazan, Plaza Txikian, Olazko Amaren plazan eta herriko plazan. Jarraian, taldeko kideak zein kide ohiak bazkarirako elkartuko dira.
Antolatzaileek azaldu dute larunbatean eguraldiak laguntzen ez badu dantza ekitaldia frontoian eskainiko dutela. Halaber, Itsasiko kideek taldekide ohi guztiak gonbidatu eta animatu dituzte bertan parte hartzera: izena emateko Itsasiko kideren batekin hitz egin edo itsasieuskalkulturtaldea@gmail.com helbidera idatzi beharko da.
