Iruñera eramango dituzte gaur Zuberoako maskaradak

Barrikadak izango dira goizean Alde Zaharreko kaleetan, eta Burgoen plazan ariko dira arratsaldean

Godalet dantza da maskaraden elementurik ezagunena, eta maiz dantzatzen da Zuberoatik kanpo. Hori baino gehiago dira, ordea, maskaradak; antzerkia, musika, dantza eta hitza nahasten dituen egun osoko festa, eta hori ikusiko da gaur Iruñean. «Hangoa bezalakoa izango da, baina ezberdina, hirian izango delako. Maskaradetan izaten den herri giroari nolabait ere eusteko erabaki dugu festa Alde Zaharrera eramatea», dio Lasartek.

Kaleak bete barrikada

Maskaradak 11:00etan hasiko dira, San Lorentzo plazan. Han jarriko diete Iruñera gonbidatu dituzten Ortzadar taldeko kideek lehen barrikada Larraineko gazteei, eta beren hirian maskaradak jokatzeko bezain onak direla erakutsi beharko diete, gainera, aurrera jarraitu nahi izanez gero. 11:30ean Iruña taldearekin batera ariko dira San Lorentzo kalean jarriko dieten bigarren barrikadan, eta 12:00etan izango dute hirugarrena, Kale Nagusian. 12:30ean Muthiko Alaiak peñaren parean egin beharko dute erakustaldia, eta 13:00etan Mercaderes kalean.

Burgoen plazan jokatuko da bigarren zatia, 17:00etan. Orduan ikusi eta entzungo dituzte iruindarrek Zuberoako folkloreko pertsonaia ezagunenak dantza, kanta, hizketa eta jokoan. Bertako eta kanpoko zirto eta predikuak ere entzungo dituzte.