Dantza taldea soilik ez, sorkuntzara bideraturiko bilgunea da Orbeldi. Izan ere, besteak beste, urtero antolatzen duten Dantza Egunaren baitan, aurreko hilabeteetan ondutako ikuskizuna aurkezten dute jendaurrean. "Borobil" izan zen iazkoa. Aurten, apirilaren 5ean ospatzekoak diren egun horren baitan ere ziur aurkeztuko dute lankidetza ardatz duen sorkuntza lan berria.
Dantza Egunetik haratago, ordea, emanaldi gehiago plazaratzen dituzte, esaterako inauterietan edota urteko beste zenbait uneetan. Adibidez, 2023ko abenduan Sutegin oholtzaratu zuten Xabier Lizardiren "Bihotzbegietan" liburuko poesia Gipuzkoako euskal dantza tradizionalarekin uztartu zuena. Kalean soilik ez, kultur-etxeko auditorioan estreinatu izan dituzte eta hainbat ikuskizun, noiz edo noiz NOAUA! K.E.-ren Kulturaldiaren baitan, datorren emanaldiarekin egingo duten moduan.
"Inguru bat ahantzia geratzen dena"
Izan ere, bigarren urtez jarraian, azarotik otsailera aurreratu du NOAUA! K.E.-k Kulturaldia. Kultur ziklo honi hasiera emango diona Orbeldi dantza taldea izango da, Sutegiko auditorioan oholtzaratuko duen "Iparrera begira" ikuskizun berriarekin.
Dantza taldetik aurreratu dutenez, Ipar Euskal Herrira begira jarraituko gaitu emanaldi honek. Izan ere, "ohituraz euskaldunok badugu gure inguruan zer gertatzen den jakiteko berri, baina bada Euskal Herrian inguru bat ahantzia geratzen dena gehienetan, Ipar Euskal Herria. Jakina denez Lapurdi, Baxenafarroan eta Zuberoan badute dantzarako ohitura, baita hauekin jolasteko gaitasuna ere".
Horregatik, ikuskizun honetan, "Orbedi Dantza taldeak hiru probintzia hauetan dantzatzen dituzten dantza ezberdinak plazaratuko dizkigu, bolantetatik kontradantzetara, jauzietatik makil jokoetara. Hain gertu bezain urrun sentitzen dugu Iparraldea batzuetan, eta emanaldi honetan bertan ikusi dezakegunaren zertzelada bat aurkituko dugu", iragarri dute.
Gonbidapenak eskuragarri
Emanaldia otsailaren 1ean izango da, iluntzeko 19:00etan Sutegiko auditorioan. Sarrerak doakoak izango dira, baina gonbidapen gisa eskuratu beharko dira aurrez, bideotatik; usurbilkultura.eus plataforman edota NOAUA! K.E.-ren egoitzan.
Dokumentuaren akzioak
"Iparrera begira" jarriko gaitu Orbeldik Kulturaldian estreinatuko duen ikuskizunean
Dokumentuaren akzioak
