Iparraldeko Dantzari Egunaren itzulera Hendaian ospatuko da

Hendaiako Akelarre dantza taldearen eta Herriko Etxearen laguntzarekin, Iparraldeko Dantzarien Biltzarrak (IDB) Iparraldeko Dantzari Eguna berriz martxan jartzeko apustua egin du. Musika, dantza eta ekintzaz beteriko egitaraua antolatu dute apirilaren 13rako. «Ipar Euskal Herriko txoko ezberdinetako dantzariak biltzeko, elkar ezagutzeko eta egun polit bat pasatzeko intentzioarekin sortutako eguna» Hendaian ospatuko da aurten, baina IDBk hurrengo urteetan «bai Xiberoa zein Baxe Nafarroa bisitatzeko asmoa ere» adierazi du bere prentsa oharrean.

Eguna 10:00etan hasiko da, «herria dantzan» jarriz: Ipar Euskal Herri osoko xoko ezberdinetatik datozen dantza taldeak Kaneta, Entrepuentes eta Gaztelu guneak alaituko dituzte haien dantzekin. Gero, 11:30ean, ikusgarria emanen dute Daniel Ugarte ezker paretan. Bertan, Ipar Euskal Herriko dantza taldeekin, aurten, Donostiako Goizaldi Taldea izanen da, gomitatu gisa. 14:00etan bazkari alaitua izanen da eta 17:00etan dantza desafioak izanen dira. Ondotik, Jeiki Hadi Taldeak alaiturik zintzur bustitzeari utziko diote lekua, eta bukatzeko, 20:00etan, Holako Delux taldearen dantzaldi-kontzertua eskainia izanen da. Egun osoan zehar ostatuak irekiak izanen dira eta afalorduan taloak ere izanen dira. 

Jadanik hamalau dantza taldek eman dute izena, guzira 250 dantzari baina gehiago bilduz. Beste guziek martxoaren 15a arte izango dute izen emateko aukera. Bazkarirako ere izena eman behar da, lekuak mugatuak izanik, beraz lehenbailehen (+33) (0) 6 64 81 78 56 zenbakira deitu behar da edo iparraldekodantzarienbiltzarra@gmail.com helbidera idatzi.