Ingalaterratik Untzagara zazpi egunetan

Baina etxeko dantzariak, Kezka Dantza Taldeakoak, oso momento berezian ailegatzen dira Euskal Jaiara. Joan den asteburuan Ingalaterran egon ziren Sword Spectacular jaialdian parte hartzeko. Bueltan, Oier Araolazak horrela deskribatzen du esperientzia. «Emanaldiak izugarri joan dira, jendearen eta beste taldeen harrera oso ona izan da. Harritu dira gure ezpatadantzarekin eta behin eta berriz zoriondu gaituzte emanaldi guztietan. Bukaeran balorazioa egiterakoan guztiak azpimarratzen zuten Euskal Herriko taldea, 'The Basque team'».

Dena dela, lana kostatu zaie horrelako maila ematea. «Guretzat gogorra izan da. Ez gaude ohituta hainbeste aldiz dantza egitera. Kontuan hartu behar da beste ezpatadantza batzuk ez direla fisikoki hain exijenteak» aipatzen du. Guztira, Kezkako lagunek lau aldiz egin zuten dantza larunbatean eta beste lau igandean. «Pila da guretzat, baina preparatuta joan ginen rotazioak egiteko, lesioei aurre egiteko... Ondo neurtu dugu eta gure jendea benetan zoragarri portatu da».

Arku dantzen argazki ona

Horrelako ekitaldian parte hartu eta gero ez dago atsedenik, Euskal Jaia gainean dago eta. «Bete betean sartuta gaude asteburukoarekin, ilusio askorekin gainera». Aurten ere programa polita prestatu delakoan, Iruñako Duguna Dantza Taldearekin elkarlana indartu egin da. Ezpalak jaialdiaren barne hamabi taldek parte hartuko dute, horietatik zortzi Eibarren.

«Kanpoko taldeentzat, Iruña reklamo garbixeagoa da. San Ferminak direla eta, oso ezaguna da atzerrian ere eta horrek asko errezten du lana» azaltzen du Oierrek. «Aurtengo programa oso argazki ona izan daiteke arku dan-tzak zer diren ikusteko. Programa oso orekatua da eta taldeak oso desberdinak». Aukera honetan, mendez mende dantza egin duten herrietatik etorriko dira, baita talde estrukturagoak ere. «Kontraste horrek esparru guztia erakusteko aukera ematen digu». Taldeak Frantzia, Galizia, Burgos, eta Kanarietatik datoz alde batetik eta Iruña, Añorga, Oñati eta Eibartik bestetik.

Gaur jokoak eta antzerkia

Euskal Jaiaren asteburura hasiera emateko, gaur arratsaldean umeak jokatzeko aukera izango dute. Txikiak eta haien gurasoak parte hartzera deituak daude, betiko jokoetan parte hartzera. Beste aldetik, Arrate Kultur Elkarteak prestatutako ekitaldian Filamento Farolaria ikuskisuna emango du Xabi Larrea clown eta mimoa, kalean edo karpan euria badago.