Indonesia, Mexiko eta Errumaniako dantzak, Folklore Bizian jaialdian

Udalak harrera egin die astearte honetan jaialdiko parte hartzaileei.

Indonesia, Mexiko eta Errumaniako dantzari profesionalak Galdakaon bilduko dira astearte eta asteazken honetan Andra Mari taldeak Udalarekin elkarlanean antolatzen duen Folklore Bizian jaialdiaren 36. edizioa ospatzeko. Zehazki, Doina Timisului (Errumania), KFT Radha Sarisha (Indonesia) eta Viva Chihuahua (Mexiko) dira ekimenera batuko diren taldeak.

Udalak astearte honetan, eguerdian, eman die ongietorria iluntzean hasiko den jaialdian parte hartuko duten dantzariei, eta, harrera ekitaldi horretan, Iñigo Hernando alkateak merezi duen garrantzia eman nahi izan dio Folklore Bizian jaialdiari «herrian errotuta dagoelako eta Galdakao erreferente kulturala izateko balio duelako, hots, Galdakao mapan jartzeko».

Halaber, Edurne Espilla Kultura zinegotziak azpimarratu du «oso inportantea» dela beste kulturak ezagutzea, pertsona aberatsagoak egiten gaituelako, eta Afi, Andi eta Uni indonesiarrak erabat eskertuta agertu dira gonbitagatik eta gogotsu agertu dira euskal kultura eta herriak ezagutzeko «oso ezberdinak direlako hemengo herriak eta eraikinak».

Egitarauari dagokionez, astearte honetan, uztailaren 18an, 20.30ean hasita, Andra Mari dantza taldea, Doina Timisului (Errumania), KFT Radha Sarisha (Indonesia) igoko dira Kurtzeko Plazako oholtzara (euria egitekotan Kurtzeko frontoian egingo litzateke emanaldia). Eta asteazkenean, uztailaren 19an, 20.30etik aurrera, KFT Radha Sarisha (Indonesia) eta Viva Chihuahua (Mexiko) ariko dira, Kurtzeko plazan (euria bada, frontoian).

Bestalde, parte-hartzaileek beste zenbait ekintza egingo dituzte, hala nola, Plazakoetxen dagoen adinekoen eguneko zentrora eta haurren udalekuetara bisita.

Hori esanda, aurten ere, Kurtzeko Plazan, mahaiak jarriko dira jendeak jan-edanean lasai egoteko aukera izan dezan eta txosna zein food truckak izango dira. Folklore Bizianeko koloreak eta mundu zabaleko dantzak Usansolora ere helduko dira, ostegunean, Unkina kiroldegian arituko baitira 20.00etatik aurrera.