Inauteri giroa otsailaren 2an eta 3an zabalduko da Areson

Mozorro lehiaketa egingo dute larunbatean

Ostiralean, 15:00etan eskolako haurren kalejirarekin emango zaie hasiera inauteriei eta hori bukatzean merienda izango da. 17:00etan trikitilarien emanaldia izango da plazan eta 18:00etatik aurrera herriko eskea egingo da. Gauean Lagun Artekoek afaria egingo dute Pake Toki elkartean.

Larunbatean egun osoko pestari eusteko gosaria izango dute elkartean Lagun Artekoek. 10:00etan abiatuko dira baserrietako eskea egitera eta arratsaldera arte batetik bestera ibiliko dira. 17:30ean karrozak aterako dira eta ondoren musika izango da plazan. Herri afaria izango da gero Pake Tokin. 3-12 urte artekoek 8 euro ordaindu beharko dituzte eta 12 urtetik gorakoek 15 euro. Menua: sarrerakoak, zopa, oilasko errea patatekin, gazta eta irasagarra, kafea pastekin eta kopa. Herritar guztiei mozorrotzeko deia luzatu diete Lagun Artekoek eta mozorro berezienek saria izango dute. Afalondoa trikitilariek girotuko dute eta pestak goizaldera arte segituko du.