Ikuskizun «dastagarria» BAD jaialdian

'Bicho eres un bicho' estreinatuko dute gaur Idoia Zabaleta eta Filipa Francisco koreografoek Bilbon

Bicho liburua aurkeztuko dute, alde batetik, gaur Idoia Zabaleta eta Filipa Francisco koreografoek, BAD Bilbo Antzerkia eta Dantza Garaikidearen Jaialdiaren barruan. Ez da ohikoa bi koreografo idazle lanetan ikustea; ez dira bakarrik aritu lan horretan, «konplizeak» izan dituztela ere onartzen dute. Izan ere, proiektuaren lehen asmoa ez zen liburua kaleratzea, performance bat osatzea bazik.

Buruan zuten proiektua gauzatu aurretik, elkar ondo ezagutu behar zutela uste zuten Zabaleta eta Franciscok. Elkarri gutunak bidaltzea otu zitzaien orduan, bakoitzaren usteak, asmoak, beldurrak, proiektuak bata besteari kontatuz. Urtebetez egon ziren elkarri eskutitzak bidaltzen. Denbora horretan izandako elkarrizketak bildu eta liburu gisa aurkeztea pentsatu zuten; gaur aurkeztuko den Bicho liburua da horren emaitza.

'Performance' dastagarria

Hastapenetatik gogoan zuten performance-aren antzezpena ere egingo dute gaur, Bicho eres un bicho. Gonbidatu bereziak ere izango dituzte taula gainean: Andoni Aduriz eta Javier Bergara sukaldariak eta Ixiar Rozas idazlea. Artistek agertokian ematen dutenaren inguruan egiten dute gogoeta Zabaletak eta Franciscok. Hitzez hitz, antzezleak dastatzera gonbidatzen dituzte ikuskizunean.

Performance hau Menage a... programaren zati da, sorkuntza garaikidea eta esperimentazioa bilatzea xede duena. Beste hainbat ikuskizun ere jasotzen ditu jaialdiak, besteak beste, Thank you very much Vicente Arlandisena eta Blue Juan Dominguezena.