Ihauteriak biziarazten ari dira Hiriburun

Hiriburuko Leinua, Uhaina, Hiriburu Pastorala, ikasleen burasoak, Euskaraz Bizi Hiriburun eta Herriko Etxea elkarlanean ari dira herriko ihauteriak biziarazi eta antzinako ohiturak berreskuratzeko. Hala, martxoaren 7an Zanpantzar heldu da Hiriburura eta ikusgarri andana bat prestatu dute.

Egunari desfilearekin emanen zaio hastapena, arratsaldeko 14.30ean, Biltokitik Plaza Berriranzko ibilbidea eginez. Behin bertara heldu eta, dantza eta antzerki ikusgarri bat eskainiko dute, hots, Zanpantzarren auzia. “Antzerkia, musika, dantza, umorea, olerkia eta tradizioa uztartzen dituen sorkuntza bat da. Pertsonai bazterrezin honek Euskal Herriko lurralde ezberdinetako ihauterietatik heldutako kideak auzipetuko ditu. Era orijinal eta alaian tokiko eta kanpoko kronika ikusaraziko dute”, aitzinatu dute antolatzaileek.

Hiriburuko herensuge ezagunaren hitzartzea ere iragarri dute Leinu elkarteko txarangak animatuko duen bestan. Haurrentzat jolasak eta mutxikoak ere izanen dira eta baita jatekoak eta edatekoak ere.