Hutsunea dantzatuko dute gaur Maitaldian

Nacera Belazaren konpainiak 'Le temps scellé' sorkuntzaren aitzin estreinaldia proposatuko du

Gaurko eguneko nahasketa lekuko. Sorkuntza berri batekin heldu da Nacera Belazaren konpainia. Le temps scellé (Denbora zigilupean) estreinatzekoa du hilaren bukaeran Lyonen, baina gaur 17:00etan horren aitzin estreinaldia proposatuko du Koliseoan. Lan fresko-freskoa ekarriko du, beraz. Usaian baino denbora gutxiago izan du lantzeko. Nahitarako epe laburra, bere gogoetari beste bide bat emateko asmoz. Gainera, Dalila ahizparekin lan egin du orain arte, baina, aldi honetan, beste dantzari bat ekarri du, gizonezko bat. Testuinguru horretan, «gorputzaren barnean hatsaren ibilbide baten aurkitzea» nahi izan du landu. «Arnasa gorputza baino presenteago izan dadin. Gorputza ez dagoela hor irudikatzeko gisan, mugimendua beste nonbait egingo balitz bezala». Espazioaren eta dantzariaren arteko harremanak eta, oroz gainetik, hutsuneak du interesatzen. «Hutsunea zizelkatuko» balu bezala. Hutsunearen galdera horri begira, gainerateko gogoeta guztiak ahulegiak iduritzen zaizkio.

Belaza 1968an sortu zen, Medea herrian (Algeria), eta 5 urterekin iritsi zen Reimsera (Frantzia). Koreografo autodidakta da berau, eta dantza subjektiboan murgiltzen da, dantza garaikidearen bidez.

Ullateren 'Samsara'

Arras beste estilo batean, lirikoaren munduan sartzeko gomita egingo du Maryse Delenteren konpainiak; emazteentzako omenaldia eskainiko du, 19:00etan, Herriko Kasinoan eta 12:00etan Eszena irekian. Urririk eta kanpoan, jaialdiaren hasieratik egunero eszena ireki horiek kasik 3.000 ikusle erakarriak dituzte jada. Batzuetan errepikak, besteetan sorkuntza lan batzuen saiakerak, jaialdian partaide edo gomita bereziak ikus daitezke bertan.

Gaurko azken proposamena, Victor Ullate balletarena da. Samsara ikusgarriak ekialdera doan bidaia baten egiteko proposamena dakar. Maitaldiaren lehen aldiko gomita izan zen Ullate espainiarraren konpainia, eta hogeigarren urteurrena ospatzeko molde bat dute oraingo bisita hau.