Hoztasuna gaindituz

'Papiro...flexia' .Dantza.

Normala denez, kalean bertan sortutako dantza adierazpideak freskotasuna galtzen du italiar erako agertoki batean aurkezten denean, eta hori berori izaten da hip-hop kulturako taldeek duten zailtasun handienetako bat. Arazo horri aurre egiteko, Papiro... flexia-n kemen handiz ekin diete dantzaren azpiko dramaturgiari eta inguruko alderdi eszenikoei, eta horrela bigarren planoan geratu da produktu mota hauetan ohikoa den perfekzio falta.

Gauzak horrela, sormena, irudimena eta gazte izatearen poztasuna izan dira nagusi emanaldian zehar: Circle of Trusteko kideek beren gaitasun akrobatikoa eta talde koordinazioa erakutsi dute, konta ezinezko itzulipurdiak, airetiko jauziak, buruz beherako jirabirak eta eskortzo estatikoak teknika eta segurtasun handiz deskribatuz. Logela Multimediaren zeregina, berriz, inoiz baino helduago etorri zaigu, benetan interesgarriak izan direlako uneoro bai musika elektroniko atsegina bai pantailan emandako irudiak. Alde horretatik, bereziki aberatsa iruditu zait irudi digitalen eta errealitatearen arteko elkarreragin etengabea.

Saioaren lehen minutuetan ikusleek zuhur jokatu dute, segur aski Euskalduna Jauregiak sortzen duen hoztasun eta kontrol giroaren ondorioz, baina Logela eta Circle of Trusten emanaldiak ikusleen txaloak piztu ditu erdialdetik aurrera, eta geroztik gusturago sentitu gara guztiok. Seguru nago gaur bertan Elorrioko Arriola aretoan errepikatuko den emanaldian merezi duten harrera beroa jasoko dutela talde biek.

Koreografia: Circle of Truts. Musika eta irudiak: Logela Multimedia. Lekua: Bilboko Euskalduna Jauregia. Eguna: Abenduak 17.