Eskoriatzako kulturaren zati bat berreskuratu nahi izan dute Gorosarri dantza taldekoek eta zigor-dantza berritua estreinatu dute herritarren aurrean.
Idoia Lahidalga dantza-irakasleak horrela berrinterpretatu du 1948ko soka-dantza: Demetrio Iriarteren Leintz martxarekin hasi da; ondoren, 1988an Trankilek eta Juan Carlos Irizarrek konposatutako Eskoriatzako ereserkiari dantza-pausuak jarri dizkiote; desafio eta banakoarekin jarraitu du soka-dantzak; lehen plazetan ohikoak ziren agarrau batekin segi; eta aurten sanpedro jaiei hasiera eman dieten Zapatistei agurra dantzatu diete. Bukatzeko, azken desafioa egin dute, eta, ostean, herritarrak gonbidatu dituzte amaieran elkarrekin fandangoa eta arin-arina dantzatzera.
