Harribil dantza taldeak 30 urte beteko ditu datorren urtean, eta horrexegatik, aurtengo emanaldia inoiz baino bereziagoa izango da. Dantzariek ez ezik, herriko hainbat eragilek hartuko dute parte ostiraleko Herribil ikuskizunean. Hala nola, Salatxo abesbatzako ahotsak, Danbolin Musika eta Dantza Eskolako musikariak eta ikasleak, Errikotxia taldeko bertsolariak eta Talaimendi elkarteko dantzariak igoko dira oholtza gainera.
Emanaldian, euskal dantza tradizionala eta garaikidea uztartuko dituzte. Gainera, 30. urteurrenaren harira, Harribil taldeak 2008. urtean sortu zenetik orain arte egindako ibilbidea gogorarazi nahi izan du. Horretarako, beren lehen lana Urratsen Oihartzuna eskaini zutenetik, azken emanaldia, Hegaldia, egin zuten arte jasotako koreografiak erakutsiko dituzte biharko emanaldian. Horrez gain, dantza taldeko kideek jakinarazi dute ekitaldiaren amaieran zenbait sorpresa ere izango direla.
Bihar, ostiralarekin, 22:00etan hasiko da ikuskizuna, Karela kiroldegian. Sarrerek 2 euro balio dute, eta momentuan bertan erosi ahalko dituzte herritarrek.
