Herri Jaialdi berriak euskal kulturari tokia eginen dio bihar Biarritzen

«Aspaldidanik genuen ohiko euskal dantza eta musikaren aldeko gune berezi bat sortzeko nahia eta beharra» hitzekin azaldu dute antolatzaileek jaialdi berri honen sorrera. Euskal kultura tradizionalaren topaleku honek betiko ikusgarriekin batera ohiko gai eta adierazpideen inguruan egindako sorkuntzak biltzen dituela ere azpimarratu nahi izan dute: «Nola ez aipa ohiko euskal musikak eta dantzak bertze ezaugarri berriak bilatzen dituztela, alabaina norberak bere aldetik Zuberoatik Bizkaira eta Nafarroatik Lapurdira».

Biarritzeko jaialdi hau talde berrien lehen agertoki ere izanen da. Lehen aldiz agertuko dira ikusleriaren aurrean Mamutzak taldeko hogeita bost musikariak, elkarte berri hau lehengo Burrunkatik jalgi da. Bestalde, A Batucada Boum elkartekoak bi urtetarik behin elkartzen dira Afrikako eta Brasilgo doinuak elkartzen dituen musika egiteko. Biarritzen 30 lagun bilduko dira agogo, txokalo eta repinike izeneko instrumentuak jotzera.

Talde eta bakarlari ezberdinek Biarritz aukeratu dute beren lanak aurkezteko. «Bodarin», «Sorginak» eta «Mihimena» ikusgarriak izanen dira besteak beste.

Disko aurkezpenak ere eginen dira hiriko hainbat txokotan.Emanaldi hauez gain karrikak eta plazak euskal musikaz beteko dira asteburuan zehar eta asteartera arte. Esaterako, Atharratzeko maskaradarekin irri egiteko parada izango da gaur hamaiketan hiriko merkatuan.