Dantza emanaldia oparoa eta dotorea eman dute Otsolar dantza taldeko kideek. 40 dantzari inguru aritu dira, hainbat adinetakoak, eta beraien trebezia erakutsi dute. Tartean, Onditz Esnaola lizartzarrak eta Jurgi Errandonea andoaindarrak emanaldi berezia eskaini dute. Dantza sueltoko hainbat txapelketa irabazi dituzte bi dantzari gazteek. Aipamen berezia ere merezi dute herriko musikariek: Jexux Mari Esnaolaren zuzendaritzapean, zuzenean jo dituzte emanaldiko pieza guztiak. Musikariak, gainera, eskolako haur bezala mozorrotuta egon dira.
Gaurko emanaldia ere aprobetxatu dute lizartzarrek gogora ekartzeko aurten Eskola Txikien festa herrian egingo dela. Saioarn dantza bat eskola txikien abestiarekin osatu dute, eta mahai bat ere jarri dute frontoian bertan, festaren inguruko materiala salduz.
Emanaldia bukatu ondoren, bazkaltzera joan dira partaide guztiak. Festa giroa piztu da dagoeneko Lizartzan, eta hurrengo asteburuan izango du jarraipena. Orduan, mozorroen txanda izango da.
