Helduen dantza txapelketa gaur arratsaldean izango da

Arratsaldeko 6:30etatik aurrera berrogeita bost urtetik gorako bikoteak dantza sueltoan lehiatuko dira Zeraingo plazan. Bikoteko arin-arin eta fandango bana dantzatu beharko dituzte. Iaz egin zen txapelketa hau lehenengo aldiz, eta eduki zuen arrakasta ikusita ezin aurten antolatu gabe utzi.

Gainontzean, gaurkoan egitarau zabala izango da. Goizeko 9etan txistulariak goiz-eresia joko dute etxez etxe. Goizeko 11etan Meza Nagusia ospatuko da. Jarraian, eguerdi partean, txakolin dastatzea izango da herriko plazan, pintxoekin lagunduta. Goizez nahiz arratsaldez, Andramari bola txapelketa jokatuko da Liztormendi bolatokian. Iluntzean gazteek triki-poteoa egingo dute eta ondoren elkarrekin afaltzera joango dira Oihartera. Gauean, 12etan, jada ohitura bihurtu den asto-karrera jokatuko da eliz atzetik bueltan.

Gaurko egun berezi honekin, aurtengo Zeraingo jaiek erdia egin dute. Baina umore onean, orain arte bezala jarraituko dute zeraindarrek eta ingurukoek herriko festez gozatze.