Haurtzaro Dantza taldea etxean da Bartzelonan erakustaldi eskaini eta gero

Arestian aipatu bezala, dantzari hauek ilusioz beteta iritsiko dira Bartzelona iparraldeko hiri horretara. Izan ere, hogeita zortzigarren urtez, Nazioarteko Musika Jaialdiak bere ateak ireki ditu Cantonigrós herrian. Horrela hogeita hiru herri ezberdinetako taldeek parte hartuko dute eta beren hobena eskainiko bertaratzen diren guztiei. Abeslari eta dantzari ugari bilduko denez, Garrotxa, Selva eta Bages eta Osonako eskualdeko etxeetan biziko dira lauzpabost egun horietan.

Nazioarteko lehiaketa hau urtero ospatzen da herri honetan, 1983tik gaur arte, eta beti uda sasoi honen inguruan izaten da, hau da, uztailaren erdi aldean. Bere helburua estilo, interpretazio, abesbatza literatura, ahots heziketa, dantza tradizional eta herrialde bakoitzeko era desberdinen arteko truke bat ahalbideratzeko, munduko talde desberdinak biltzea da.

Besteak beste, honoko herrialdeko artistak bilduko dira: Bulgaria, Txina, Kolonbia, Korea, Eslovenia, Filipinak, Georgia, Grezia, Herbehereak, Indonesia, Ingalaterra, Italia, Lituania, Mexiko, Polonia, Errepublika Txekiarra, Errusia, Suitza, Taiwan, Ukraina, Venezuela, Katalunia eta Euskadi.

Haurtzaroko dantza taldeak gutxienez bi ekitaldi eskainiko ditu: lehena uztailaren 15ean egin zuen arratsaldeko 19.30ean eta bigarrena larunbatean izan zen arratsaldeko 15:00etan.

Dantzari hauen itzulera, atzo izan zen. Ordurako Euskal Herriko dantzaren xarma erakutsia izango dute Kataluniako paraje eder horietan.

Denok dakigun bezala, Haurtzaro Ikastolak ikas ordutik kanpo hainbat ekintza antolatzen ditu, ekintza estraeskolarrak deritzanak. Hauetako bat euskal dantza da eta honen helburua ahalik eta haur eta gaztetxo gehienak Euskal Herriko dantzak ikastea da; herriko hainbat ekitalditan parte hartzen du Haurtzaroko dantza taldeak, hala nola, Xanixtebanetako Soka-dantzan, Inauterietako Intxixuen jaialdian, auzoetako festetan... Horrez gain, herritik kanpo jaialdi, txapelketa eta abarretan, Kataluniakoa adierazi dugun modura.

Tarte hau aprobetxatuz, zoriondu nahi ditugu Haurtzaro Dantza taldeko partaide guztiak, dantzariak, irakasleak eta gurasoak ere, denok jarritako indarra eta kemenarengatik.

Erakusketa ikusgai

Ramon Zulaikaren figura eta bizi-tza gogora ekartzeko antolatu den argazki eta material erakusketaren ordutegian aldaketak izan dira: astelehenetik larunbatera, 09:00etatik 13:00etara egongo da irekita Manuel Lekuona bibliotekako lehenengo solairuan ikusgai dagoen erakusketa (arratsaldez itxita egongo da).

Uztailaren 31 arte egongo da Ramon Zulaikak ateratako argazkiekin eta berari ateratakoekin osatuta dagoen erakusketa grafikoa Manuel Lekuona bibliotekan. Xanistebanetan, berriz, erakusketa udaletxeko areto nagusian egongo da ikusgai, goizez eta arratsaldez.