Haurrentzako dantza jaialdia estreinatuko dute bihar Miarritzen

Maitaldiaren haritik antolatu dute; sorkuntza batekin hasiko da, eta Thierry Malandainek zuzenduko du

Lau urte baino gehiago dituzten haurrentzat pentsatua da, hain zuzen, Traversee konpainiaren lan berria. Johanna Etxeberrik eta Raul Garcia Etxeberriak elkarrekin asmatua dute. Lehena dantzaria da, eta bigarrena, antzerkilari eta musikaria. Claude Boujonen La brouille liburutik hartu dute ideia libreki Les voisins, Battit et Luzia, Auzokoak lanerako. Battit eta Luzia bi auzo dira. Eguneroko plazera elkar kitzikatzea dute. Haserreak laguntasuna arriskuan jartzeraino. Umorearekin landu duten istorioa da, elkarren ondoan bizitzeak zer esan nahi duen jorratzeko erabili dute. Bihar 16:00etan diote lehen aldiz aurkeztuko publikoari. Biharamunean, berriz, ikasleentzako emanaldi bereziak eskainiko dituzte.

Ikusgarriez gain, tailer bereziak proposatzen ditu jaialdiak. Guztiei irekien artean, 3 eta 5 urte arteko haurrentzat eta haien gurasoentzat asmatua da larunbatean, 10:00etan, Midi geltokiko estudio handian izango den tailerra. Guztiak dantzan aritzeko tailerra izanen da. Eta, 15:00etan, Rincon Habanero jatetxe ostatuan Boum izenburuko tailerra proposatuko du Pernette konpainiak. Koreografiak asmatzeko aitzakia izanen da elkarretaratzea.

Gainerateko ikusgarrien artean, ostiralean, 20:30ean, Peter Panek inspiratu Et droit devant jusqu'au matin? taularatuko du NGC 25 konpainiak, Midi geltokian —8 urtetik haste—, eta larunbatean, 11:00etan, Chimeres taldearen Decouvertes gunean, Pernette konpainiak Animale eskainiko du, 5 urtekoentzat.

Thierry Malandain. / IMANOL OTEGI / ARP