Harribil dantza taldeak aurten ere Herribil ikuskizuna eskaini du Gabon hauen atarian. Berezia izan da, ordea, hamazazpigarren edizio hau, dantza taldeak 30 urte beteko dituelako aurki. "Guretzat berezia izan da emanaldia, 30 urte hauetan egindako bidea erakutsi nahi izan dugulako oholtza gainean, eta uste dugu lortu dugula. Pare bat ezusteko ere izan genituen, zuzenekoetan gertatu ohi diren kontuak dira, eta oso pozik eta gustura gaude egindakoarekin gure artean sinergia polita sortu zelako", azaldu du taldeak.
Emanaldian parte hartu duten eragile guztiekiko eskertuta agertu da Harribil: "Eskerrak eman nahi dizkiogu Danbolin musika eta dantza eskolari, baita Salatxo abesbatzari ere. Errikotxia bertso eskolari ere bai, emanaldiari hasiera emateko bertsoa eskaintzeagatik, eta baita Talaimendiri ere, noski, beti bezala oholtza gainean gurekin dantza egiteagatik. Baita teknikari guztiei ere, haien lana atzekoa izan arren, garrantzitsua delako".
Partaideei ez ezik, herriari ere eskerrak eman dizkio dantza taldeak. "Herriak urtero, Gabonetako ekitaldi berezi honetan, 0s0 0ndo erantzun izan du. Aurten bi euroko sarrera sinbolikoa jarri genuen, Harribilentzat diru galera handia delako emanaldi hori antolatzea. Galerak hor jarraitu du, baina zerbait arindu dugu, behintzat. Izan ere, uste dugu kulturak ezin duela beti doakoa izan, eta kultur taldeok ezin dugula soilik diru laguntzetatik aurrera egin".
Taldea gogotsu agertu da datorren Gabonetan ere ikuskizuna eskaintzeko, eta helburua argi dute: "Ea aurtengoa bezain emanaldi berezia sortzen dugun eta herritarrei gustatzen zaien".
