Harrera arrakastatsua ukan du Inesa de Gaxen pastoralak

Inesa de Gaxen pastoralaren lehen bi emanaldiak arrakasta handiz ospatu ziren Bastidan, ekainaren 15 eta 16an. Pantxika Urruty errejentak zuzenduriko ikuskizuna lehen aldiz oholtzaratu zuten ekainaren erdialdean, ehunka ikusleren aitzinean. Harrera beroa, uda ondotik errepikatzeko parada ukanen duena, Inesa de Gaxenen bizia berriz gorpuztuko baitute Xarneguko herritarrek irailaren 21 eta 22an.

Xarnegu zonaldeko zazpi herriek elkarlanean ekoitzi duten pastoralak, hain zuzen, bertakoa zen Gaxengo Inesaren historia erreproduzitu du. Horretarako bildu dira herriotako kasik ehun biztanle, hilabete luzez lan eginez, emaztearen bizita oholtzara eraman aitzin. Xarnegu Pastorala Sharnega elkartearen baitan antolatu dira herritar eta antolatzaileak.

Euskal kulturaren eta tokiko historiaren uztarketa da pastoral honen bereizgarri nagusietakoa, elebitan, euskaraz eta gaskoieraz gauzatu baita, bi hizkuntzen elkarbizitza azaleratuz. Itxaro Borda eta Yvan Bareyre idazleak arduratu dira hizkuntza bakoitzeko idazketa lanez. «Inesa de Gaxen Bastidan sortu zen, mugako herri batean. Baina hemen ez da mugarik. Gaskoia eta euskara nahasten diren leku batean gira. Zerbait egin behar zela pentsatu nuen», azaldu du Urrutyk.

Pantxika Urruty, pastoral honen arima sortzailea, 2017tik bere lan eta pasioa eskaintzen ari zaio proiektu honi. Errejentaren bosgarren pastorala da, euskal eta gaskoieraren nahasketaren bitartez, sorginkeriagatik bi aldiz giltzapetua izan zen Bastidako emaztearen historia kontatzen duena.

Emanaldi eguna

Bastidan ekainean iragan ziren emanaldietan bezala, Bardozeko emanaldiak ere arratsaldez eskainiko dituzte. Baina hitzordua goizeko 11:00etan da, musikari eta arizaleen herriko karriketan gaindiko ibilaldiarekin abiatzeko eguneko egitaraua. Emanaldi bakoitzerako 1.000 sartze ezarri dira salgai, sarean eta tokiko turismo bulegoetan eskuragarri.

Pastoralaren testua frantses eta espainolerako itzulpenekin eskuragarri egonen da lekuan bertan, ikusle guziek oholtzan gertatzen denaren xehetasunak jarraitu ahal izateko. Herriko ostatuek otorduak eta edariak eskainiko dituzte egun berezi horietan.