Hankak nekatu arte dantzan

Zapata zola puskatu arte dantza egiteko aukera izango da bihar, Errenteriako XI. Erromeria Egunean

Goizeko hamarretan diana joko dute, herriko kaleetan zehar. Ongietorria are gehiago gozatzeko, hamaiketakoa egingo dute, Esmalterian. Eta tripak berdindu ondoren hasiko dira dantzan, kalez kale ibiliko diren musikariekin.

12:15ean, Ereintzako neskek sokadantza egingo dute, Zumardian. Ohitura bihurtu nahi dute nesken dantza, Oarsoaldean gizondantza gehiago egiten baita.

Gero, Intxaurrondo elkarte gastronomikoak laurehun lagun ingururentzat bazkaria prestatuko du, udal kiroldegian.

Aurrez zer dantzatua egongo bada ere, seietan izango da dantzarako momentu nagusia, herriko hainbat gunetan: Zumardian, Leku Zarran eta Xabier Olaskoaga plazan, besteak beste. 18:30ean emango du emanaldia Aiko taldeak, Zumardian.

Jon Maya dantzariak dioenez, «helburua jendeak dantzak ezagutzea da, baina parte hartuz».