Groseko inude eta artzainek Verdini dantza taldea sarituko dute

Artainu izena du Groseko inude eta artzainen konpartsak. Azken hamarkadan handituz joan da auzoko taldea, eta, aurten, 77 dantzari, 29 danborrari eta 54 figurante aterako dira kalera; guztira 160 lagun izango dira. Bi urtez pandemiaren ondorioz geldirik egon dira, baina igandean, otsailaren 5ean, bueltatuko dira.

Txofre kaletik abiatuko dira 11:15ean, eta handik hasiko dira auzo guztia zeharkatzen: Jose Maria Soroa, Marino Tabuyo, Jose Arana, Bermingham, San Frantzisko eta Katalunia plaza. Plazan parodia antzeztuko dute 12:15ean, eta konpartsak Aitona saria emango dio Verdini dantza taldeari, desgaitasunak dituzten pertsonen alde egiten duten lanarengatik esker ona adierazteko.

Ondoren, aurrera jarraituko dute: Trueba, Secundino Esnaola, Aita Larroka, Karkizano, Mirakruz, Gloria, Galtzara nagusia, Segundo Ispizua, Claudio Delgado, Txofre plaza, eta Artetxe jeneralaren kalea. Aurreikusi dute 14:30ak aldera bukatzea desfilea.