Sanmigelak ospatzeko prest daude Iurretan. Gaur aurkeztu du Jai Batzordeak udalaren eta herriko hainbat elkarteren laguntzagaz osatutako egitaraua. Egitarau "anitza" azpimarratu dutenez. "Askotariko jendearen nahiak asetzen saiatzen gara, nahiz eta askotan hori lortzea ez den erraza, eta aurten ere ahalegin handia egin dugu horretan", diote. Ildo horretan, herriko elkarteen parte hartzea nabarmendu dute.
Irailak 28an jaurtitako txapligoekin hasiko dituzte jaiak eta urriaren 2ra bitartean urteetan errotutako hainbat ekitaldiz gozatzeko aukera egongo da. Ordurako, Gazte Asanbladak salgai jarriko ditu jaietako kamisetak eta zapiak. Hala ere, jaien bueltan sorturiko hainbat ekitaldirekin motorrak berotzeko aukera izango dute iurretarrek, asteburu honetan hasita.
Errotutako ekintzak eta urteurren bereziak
Urteetan errotutako ekitaldiek ez dute hutsik egingo: Mozorro bazkaria, Pirritx, Porrotx eta Marimototsen ikuskizuna, bertso jaialdia, Zaldi mendi taldeak antolatutako XII. Mendi Martxa, kontzertuak, tortilla txapelketa, umeentzako jolasak eta dantzariak, besteak beste. Ekitaldi guzti horiek bi nobedade nagusirekin uztartuko dira: Gorulari Dantzak berreskuratu zireneko 50. urteurrena ospatzeko hainbat belaunalditako dantzariek dantza erakustaldia eskainiko dute plaza, irailaren 29an. Estampa, Arkuak eta Zintak dantzatuko dituzte. Bestalde, Gertasport elkarteak jardunaldi berezia antolatuko du 10. urteurrena ospatzeko, Larrakozelain. Zapatu honetan, irailaren 16an, izango da hori. Horrez gain, San Migel Padel txapelketa ere jokatu da, lehenengoz.
Sanmigel "jai osasuntsuak eta askeak" izatea dute helburu bai Jai Batzordeak bai udalak. Horretarako, erasoei aurre egiteko protokoloa lantzen ari direla gogoratu dute.
Eñaut Aiartzaguena iurretarrak egin du jaiak iragartzeko kartela aurten, Jai Batzordearen enkarguz. Gorulari Dantzei keinu egiten dien kartela. "Kartel lehiaketetan parte hartzea jeitsi egin da azken urteetan. Bada aurten atseden hartzea erabaki dugu. Ikusteko dago datorren urteetan hartuko den bidea".
