Gil eta Vesgak irabazi dute Segurako dantza txapelketa

Epaimahaia bost dantza adituk osatu zuten, hain zuzen, Rafa Salaberria, Jesus Mari Garate, Izaskun Iturri, Gaizka Benguria eta Josean Atxukarrok. Irabazleek 55 punturekin lortu zuten garaipena. Bigarren sailkatuei 42 puntu eman zizkieten epaileek eta 41,50 hirugarrenei. Azken hiru urteetako irabazleek, Azpitarte anai-arrebek, ez zuten parte hartu atzoko saioan eta azken bi edizioetan bigarren egin duten Gil eta Vesga azaltzen ziren faborito garaipenerako eta pronostikoak bete egin zituzten. Zortzi aldiz parte hartu dute Segurako txapelketan eta atzokoan garaipena beraiena zela adierazi zietenean hunkituta igo ziren oholtza gainera sariak jasotzera.

Txapelketa honetako sariek ere badute berezitasunik, Nestor Basterretxeak egindako trofeoa jasotzen baitute irabazleek eta, hiru aldiz jarraian irabaziz gero, dantzariek ordezkatzen duten Udala jabetzen da eskulturaz. Azpitarte anai-arrebek Azkoitiko Udalera eraman zuten iaz saria hiru garaipen lortu ondoren eta aurtengo trofeoa berria izan da, Basterrretxeak txapelketarako egiten duen zazpigarrena. Nestor bera Seguran izan zen atzo irabazleei trofeoa ematen.

Atzoko lehiaketan 10 bikote aritu ziren dantzan oholtza gainean, horietatik 7 gipuzkoarrak eta 3 bizkaitarrak. Lehen aldiz parte hartu eta ongien sailkatutakoen-tzat eskaintzen den Gillermo Areizaga saria Sestaoko Karlos de las Heras eta Oroitz Bilbaok jaso zuten.