Giharra eta arintasuna orekan

Revolution dantza konpainiaren 'Urban Ballet' ikusi ahalko da gaur Donostian, balleta eta hip hoparen artean

Anthony Egea dantzariaren egitasmoa da Revolution konpainia. Cannesen dantza klasikoa ikasi ondoren (Frantzia), New Yorken (Ameriketako Estatu Batuak) ekin zion dantza garaikideari. Edertasuna eta indarraren arteko oreka bilatu nahi izan du bere lanean, orain arte.

Urban Ballet-en, musikaren eta dantzaren arteko erlazioak kaleko dantza eta partitura klasikoa nahastea du helburu. Interprete bakoitzak berezitasun artistiko bat adierazten du. Vivaldiren Stabat Mater musikarekin hasten da lana, dantzari bakar batekin. Bigarren zatian, Ravelen Boleroa erabiltzen du, bederatzi dantzarirekin. Iannis Xenakisen musika erabiltzen du hirugarren zatian. Azken atalean, aukera dute dantzariek norbera bere aldetik aritzeko. Donostia 2016 Europako Kultur Hiribururako Hautagaitzaren barruan antolaturiko ikuskizuna da.

'URBAN BALLET'

Noiz. Gaur, 20:00etan.

Non. Egia kultur etxean, Donostian>.