Gaur dantzak eta bihar Euskal Jaia Getarian festa egitarau zabalarekin

Goizeko 9:30etan hasiko da jaia, Getariako txistulariek goiz soinua eskainiz herriko kaleetatik. Ondoren, 10:30etatik 14:00etara bitartean, azoka izango da frontoian. Pregoia, bertso eskolako kideen eskutik, goizeko 11:00etan izango dugu Udaletxeko balkoitik, eta ordu horretatik aurrera Segurako talogileen eskutik taloak eta sagardoa txotxetik dastatzeko aukera izango da plazan. Eguerdiko 12:00etan, berriz, Gelo tronpalariaren erakustaldia izango dugu frontoian, norbera bere ziba eramatera gonbidatuta egonik. Ondoren, eguerdiko 13:00etan larrain-dantza, banakoa eta beste plazako dantzak dantzatzeko aukera izango da plazan txistulariekin, eta jarraian II. Irrintzi Lehiaketa Herrikoia ospatuko da bertan.

Arratsaldean Trikitilari Gazteen Getariako X. Txapelketaz gozatzeko aukera izango dugu plazan, arratsaldeko 17:30etatik aurrera, eguraldi txarra eginez gero hau eskolako aretora pasatuz.

Honen ostean ere jarraituko du festak, Izer eta Alabier trikitilariekin triki-poteoa eginez, eta gaueko 23:00etatik aurrera Patxi eta Konpainiarekin erromeria egonik herriko plazan ere.

Ez da beraz, aspertzeko betarik izango bihar Getarian, Udalak jaia girotzeko herritarrei ere dei egiten dielarik baserritar jantzi daitezen. Igandean, aldiz, "Ate Joka" antzezlanak (helduentzako anzerkiak) jarriko dio amaiera Euskal Asteko egitarauari, 20:00etatik aurrera, eskolako aretoan.