Galak itxiko du igandean Donostiako hilabetea

Donostiako Dantzaren Hilabetearen barruan hainbat ekintza izango dira asteburuan, ekitaldi guztiei amaia emateko. Larunbatean, Jon Vallejo Dresdeko Operako dantzari bakarlaria eta Monica Zamora Birminghamgo Royal Balleteko dantzari ohia sarituko ditu Gipuzkoako Dantzari Profesionalen Elkarteak Antzoki Zaharrean. Artista agertu-berriaren saria jasoko du Vallejok, eta ibilbide osoari emandakoa Zamorak.

Igandean, Dantzaren Nazioarteko Egunaren Gala ospatuko da Viktoria Eugenia antzokian. Alicia Amatriain, Stuttgarteko Balleteko dantzari nagusia bertan izango da. Santamaria Compañia de Danza, Thierry Malandainen Ballet Biarritz, Aukeran eta beste hainbat dantza talde izango dira Dantzaren Hilabetearen azken eguneko ekitaldian.