Aurreratu zuten egingo zutela, eta hitza bete dute. Lautadako hiru herri horietako biztanleek inauterien festa gauzatu dute asteburuan. Zamarretakoa, Gizena, Atsoa, Farfailetakoa, Senargaia eta Emaztegaia, Hartza… eta, nolatan ez ba, Lasto gizona ere.
Tradizioa 2007an berreskuratu zuten arren, Espainiako Gerra Zibilaren aurretik ere egiten zen ospakizun hori. Igande eguerdian gazteak porrero gisa ibiltzen ziren mozorroturik –ez ulertu gaizki, porrero deitzen diete inguruetako herri inauterietan parte hartzen duten pertsonaia guztiei–, umeak beldurtuz eta bihurrikeriak egiten. Arratsaldez, berriz, etxez etxe eskean ibiltzen ziren, musika tresnez hornituta, ondoren bapo afaltzeko. Astelehenean Agurainera jo ohi zuten gazteek. Asteartean, berriz, Lasto gizona prestatzen zuten, eta, urtean izandako une txar guztiengandik epaitu ostean, ondoren erretzen zuten.
