Ezpata dantza Pragako Alde Zaharreko karriketan

Kemen Dantza Taldeko 21 dantzari eta 4 musikari Txekiako hiriburuan izan dira egunotan, Prague Folk Days festibalean. Atzo eta ostiralean bina emanaldi eskaini zuten Ovocny plazan, Pragako Alde Zaharreko bihotzean. Ostegunetik gaur bitarte, 2.000 artistatik gora hartu dute parte Europa Erdialdeko folk musika eta dantza jaialdi handienetako bat den ekitaldian.

Urte batzuk zeramatzan taldeak atzerriko jaialdietan parte hartu gabe, eta aurten, nonbaitera joateko goga piztu zitzaien. «Jaialdi batzuk begiratzen egon ginen eta Pragakoa egokiena iruditu zitzaigun», azaldu zuen Saioa Zabala Aristizabal dantzariak eta Kemeneko kideak asteartean, Txekiara abiatu aurretik.

Etxetik hurbil egoteak eta ohiko jaialdietan baino gehiagotan dantzatzeko aukera izatea lehenetsi zuen talde irundarrak erabakia hartzerakoan. «Pragakoa folklore festibal handia da. Gutaz gain, 50 talde baino gehiago daude; beraz, erraza izan da bertan egotea», adierazi zuen Kemeneko dantzariak.

Aurtengoa edizio berezia da Prague Folklore Days jaialdiarentzat, ekitaldiaren 20. urteurrena ospatzen baitute. 35 herrialdetatik heldutako 65 talde elkartu dira egunotan Txekiako hiriburuan. «Uste dugu horregatik daudela hainbeste talde gonbidatu, bonbo aski ematen ari dira jaialdiari», nabarmendu zuen Zabalak.

Kemen Dantza Taldea izan da Euskal Herriko ordezkari bakarra Pragako folklore ekitaldian. «Europako talde asko daude, baita nazioarteko bakan batzuk ere, Taiwangoak edo Mexikokoak, esaterako», aipatu zuen Zabalak.

Ez da lehen aldia talde irundarrak nazioarteko jaialdi batean parte hartzen duela. Behin baino gehiagotan ibili da euskal kultura atzerrira zabaltzen. Pragako kasuan, Kemenek Gipuzkoako Foru Aldundiko Mundura dirulaguntza jaso du, lurraldeko taldeen proiektu artistikoak nazioartera eramateko helburua duen programa.

Kemeneko kideek bi saio eskaini zituzten, bata ostiralean eta bestea larunbatean. Eszenatoki paregabea izan zuten bietan: Ovocny plaza, Estatu Antzokiaren parean dagoena. «Taldeek ordu erdi izan dute beren dantzaldia egiteko. Atsedenik gabe aritu gara, goizeko 11:00etatik gaueko 21:00ak arte», aipatu zuen Zabalak.

Egun bakoitzean dantza mota bat antzeztu dutela azaldu zuen Kemeneko kideak. Ostiraleko saioan, sagardantzak eta Nafarroako Cortesko dantzak interpretatu zituzten. Lehena, Baztan bailaran inauteri garaian egiten den dantza mota bat da, eta normalean, lau dantzari izaten dira, eskuan bina sagar daramatzatela. Cortesko dantzak edo Cortesiak, aldiz, Mikel Deunaren eguneko bi une ezberdinetan dantzatu ohi dira.

Atzoko egunean, berriz, jaialdian parte hartu duten talde guztiek kalejira batean desfilatu zuten Pragako Alde Zaharretik. «Berez, taldeak beren herrialdeetako banderekin eta kartelekin doaz, baina gu ezpata dantza dantzatzen aritu gara», aipatu zuen Zabalak. Desfilearen ostean, udaleko zinegotziek harrera egin zieten udaletxean.

Arratsaldean, talde irundarrak bigarren emanaldi bat eskaini zuen Ovocny plazan. Gipuzkoako ezpata dantzak antzeztu zituzten, Hondarribian eta Irunen egin ohi dituztenak.