Festara ospakizuna izan da ekitaldirik garrantzitsuena. Atzo bezala, milaka ikus-entzule bildu dira Idaho Central Arena gunean, eta sutsuki jarraitu dituzte euskal musika eta dantza ardatz zituzten kultur emanaldiak. Hainbat talderen erakustaldi laburrez gozatu du publikoak, hala Euskal Herritik etorritako taldeenez nola Boisekoenez bertakoez.
Kanpoan, aurrera egin du jaiak; Basque Block gunean bereziki. Ostirala izanik, iragan egunetan baino jende gehiago bildu da egun osoan, eta hori nabarmen sumatu da, kasurako, jana eta edana hartzeko ilaretan. Bestela, trikiti, pandero, danbor eta txistu doinuek ez dute etenik izan gaur ere: orain arte bezala, han-hemenka sortu dira kontzertu inprobisatuak, eta jendeak gogotsu erantzun die guztiei.
Gaur, are jende gehiago espero da oraindik. Hiriaren erdigunetik Expo Idaho gunera lekualdatuko da ospakizuna, kanpoaldera, eta, bertan, emanaldi askotarikoez gozatzeko aukera izango dute bisitariek: besteak beste, Tio Teronen Semeak Euskal Herriko dantza taldearen ikuskizunaz, Oinkari Basque Dancers Boiseko dantza taldearen emanaldiaz, bertso saioez, herri kirolez eta abar.